شنبر نضارتي اتكسر
مي مختار
معلش يا ابني الخط مش واضح والنظر بقي عا الأد
ومبقتش اشوف تحت رجليا الأرض
وشنبر نضارتي اتكسر
وبقاوح باللي باقيلي من نظر
والقلم مسكاه بالعافيه
يديلك يا ابني الف عافيه
انا قولت اسألك ليه مجتليش ولازياره
طيب حتي تعال صلح لي النضاره
انا هنا مش مبسوطه ومش علي راحتي
نفسي ارجع لفرشتي وحيطان اودتي
واصحا اصلي الفجر كالعاده
وادعيلك وانا قعده ع السجاده
ذي مادعيت لك زمان تدخل طب
كل دعوه بدعيهالك لسه بتطلع م القلب
.........
الأكل هنا مش ذي طعم اكلي
والناس هنا لاطبعي ولاشكلي
انت عارفني باحب اسمع اغاني وباحب الورد وصوت العصافير
الحُزن هنا معشش في قلوب أمهات كتير .
........
انا خايفه ليه معرفش
اعتبرني مريضه في عيادتك
واكتب اسمي آخر واحده في الكشف
بس اشوفك ولو دقايق
المهم متزورنيش وانت مغصوب او متضايق
تعال لي رايق
واضحك ف وشي
واوعدك مش حقولك عاوزه امشي
........
قول لمراتك مسيرك حتبقي حما
وفكرها بعملتها
لما عيالها يطردوها من بيتها
ويحجزولها اوده في الدار
ويمضوا علي إقرار
ذي اللي انت مضيته وحجزتني
بس برضوا وحشتني
........
امبارح كان يوم صعب
الدار كان فيها حريقه وكنت بموت م الخوف
والرعب
وبعد ماطفوها جتلي حاله كده ذي ما تكون حاله عصبيه شوفت النار وهي بتقرّب من اودتي
خوفت تكون في النار نهايتي
صرخت وقولت انا عاوزه ابني
كنت ذي الطفل المتعور وبيصرخ علي امه
تلحقه وتضُمه
مشوفتش ساعتها غيرك استنجد بيه
الا صحيح هو انا كنت مضيقاكم في ايه
........
وحشني سريري وملايتي
والورد المطرز علي كيس المخده
وقعدتي ع الشلته
ولحافي القطن
وحشتني ونفسي اخد منك حُضن
وحشتني صورة ابوك المتعلقه ع الحيط
وحشني البيت
........
طلب أخير
مش عاوزه اموت هنا
انا عاوزه اموت عندنا
اقصد عندك معلش زلة لسان
افتكرته بيتي انا كمان
واوعدك حأقفل عليا باب الأوده
ولاكأني موجوده
ومش حتسمعولي حس
تعال انت خدني بس
........
انا مخرجتش م الدار ييجي اكتر من سنه
واخاف اهرب أتوه
معرفش اوصل بيتنا
ومعرفش ارجع هنا
هو انا لو توهت حتدّور عليا وتزعل
والا مش حتسأل
.......
انا كده ياابني ارتحت
لما جبت ورقه وقلم وكتبت
وياريت تكون قريت جوابي قبل مايوصلك
والصبح يطلع عليا تيجي تقولي حطلعك
وانا اوعدك حقطّع الجواب علشان متزعلش
وكأنه متكتبش
والنبي يا ابني متتأخرش
مي مختار
إرسال تعليق